Əkin sahələrində taxıl böcəyinə qarşı mübarizə tədbirləri
2024-02-15 00:00:00
Aqrar Xidmətlər Agentliyinin Bitki Mühafizəsi və Fumiqasiya (zərərsizləşdirmə) Mərkəzinin yerli mütəxəssisləri tərəfindən əkin sahələrində taxıl böcəyinin yayılmasının qarşısının alınması məqsədi ilə fitosanitar monitorinqlər həyata keçirilir. Ötən ilin noyabr ayından bugünədək 8487 hektar sahədə müşahidələr aparılmış, 1266 hektar sahədə sirayətlənmə aşkar edilmiş və 1024 hektar sahədə kimyəvi mübarizə tədbirləri həyata keçirilib. Hazırda müşahidə və mübarizə tədbirləri davam etdirilir.
Taxıl böcəyinin sürfələri əkin sahələrinə həm payızda, həm də yazda ziyan vurur. Qış mülayim keçdikdə inkişafını başa çatdırmamış sürfələr qışda da qidalanır və inkişaf edə bilir. Sürfələri bitkinin yarpaqları, yetkin fərdləri (böcəklər) isə “sütül” dənləri ilə qidalanırlar. Bir böcək imagianal həyatı dövründə orta hesabla 55 dən yeyə bilir. Mübarizə tədbirləri aparılmazsa məhsul itkisi 20-30%, hətta 70-80%-ə çata bilər.
Yetkin fərdlər sentyabr ayının ikinci ongünlüyündə yumurta qoymağa başlayırlar. Yumurtaqoyma 10-25 gün davam edir. Oktyabr ayının əvvəlində yumurtadan çıxan sürfələr ilk dövrdə torpaqda olan bitki qalıqları, sonralar isə payızlıq taxıl cücərtiləri ilə qidalanırlar. Qış dövrünü əsasən müxtəlif yaşlı sürfə mərhələsində torpağın 30-40 sm dərinliyində keçirir. Aprelin ikinci ongünlüyündən etibarən sürfələr pup mərhələsinə keçirlər. Pup mərhələsi 13-19 gün davam edir. Yetkin böcəklər may ayının II yarısından müşahidə olunmağa başlayırlar.
Bu zərərvericiyə qarşı kimyəvi mübarizə aparmaq məqsədilə payızda 1m²-də sürfələrin sayı 0,5-1 ədəd, yazda bitkilərin kollanma fazasında isə 3-5 ədəd olarsa (iqtisadi ziyanlı hədd) təsiredici maddəsi deltamethrin (25 q/l) 0,2 l/ha, imidacloprid (70%) 2 kq/ton toxum dərmanlanması, lambda cyhalothrin (50 q/l) 0,5 l/ha olan preparatlardan istifadə yüksək bioloji səmərəni təmin edir.
Fermerlərə zərərli oranizmilərin əkin sahələrinə vura biləcəkləri ziyanın vaxtında qarşısının alınması məqsədi ilə zərərvericilərin müşahidə edildiyi ilk dövrlərdə Aqrar Xidmətlər Agentliyinin yerli qurumlarına müraciət etməklə müvafiq məsləhət və tövsiyələr ala bilərlər.
QIZIL BALIQLARIN FURUNKULYOZU
2020-08-25 00:00:00